- 285 -

1373. Feb. 6. Liegnitz.

Herzog Ludwig als Vormund der liegnitzer Fürsten bestätigt den Verkauf des Schrotamts an die Stadt Liegnitz.

In gots namen amen. Wir Ludwig von gots gnaden herczog in Slezien, herr zcum Brege, vormunde der irluchten forsten Ruperts, Wenczels, Bonczels vnd Heinrichs gebrudere von den selbin gnaden ouch herczogin in Slezien herren zcu Legnicz, vnsir lyeben vettirn, tun kunt allen den, dy desen brieff sehen adir horen lezen, daz in vnsir kegenwertikheit komen synt in vormundeschaft Jesken vnde Hancken kyndere, dy erbrichtere etwenne zcu Legnicz synt gewest, dy erbern manne Paczsche von Reichenbach, burger zcur Swydenicz vnde Jungehans, burgere zcu Legnicz, dy wir ouch den selben kynden von rechts wegin zcu vormunde hatten gegebin, vnde habin bekant, daz sy myt wolbedochten mute vnde myt grosem rate der seibin kynder frunde vnde zcu vore myt vnsir vnde vnsirre vorgenante vettirn rate, gonst, wissen vnde willen, dy wir vnde sy myt volkomenheit do zcu getan vnde gegebin habin, vnde habin recht vnd redelich vorkouft vnsern lyeben getruwen ratmannen.. scheppfen, geswornen vz allen hantwerken vnde der ganczen gemeyne der vorgnanten vnser vettirn stad Legnicz, den dy iczunt syn vnde allen den, dy her nach ewiklich werden in czukomftigen czeiten, daz schrotamecht zu Legnicz myt allen gnysen, czugehorunge vnde nuczberkheit nicht uzczunemen bnamen von allen vassen, dy grozsir synt wenne eyn achteyle, do zal man schrotlon von gebin vnde von weyn vassen, dy vndir seben schokken synt, von iczlichem vasse eyn lot groschen vnde von iczlichen weyn vasse, daz obir seben schok ist, eynen halben virdunge vnde myt allir andir herschaft, myt allem rechte vnde czugehorunge, frey vnde ledik alles dinstes vnde allir beswerunge en vnde iren nachkomlyngen, dy mytburger vnde mytwoner der stadt Legnicz hernachmols syn werden ewiklich in czukomftigen czeiten von der stad Legnicz wegin zcu haben vnde zcu besiczen, vnde by namen myt alle der freiheit, herschaft vnde vndirscheiden, alz dy vorbnanten Jeske vnde Hans der egnanten kyndere vetere vormols daz schrotamecht gehabt habin vnde alz iz an dy seibin kyndire bekommen, vnde benamen in allir der mozse vnde allir wyse, alz in den handuesten, dy vormals dor obir synt gegeben, volkomlich steet bescreben vnde habin daz ebnante schrotamecht in irr vormundeschaft von der egnanten kyndir wegen ewiklich vnde erblichen vffgeloczen in vnsir vnde vnsir egnante vettirn hende, vnde baten vns durch got durch irs dinsts wille, daz czu lyen. Dez habe wir erre bete vnde getruwes dinst vnsir getruwin ratmanne vnde der ganczen gemeyne der stad Legnicz angesehen vnde habin von geheise der egnanten vnser vettirn myt rate erre eldesten getruwen manne en dez koufs vnde vfflosunge gegonst, leyen, reichen vnde habin gelegin myt geheise vnsir egenante vettirn vnsin lyeben getruwen ratmanne . . scheppfhen, gesworen vz allen handwerken vnde der ganczen gemeyne der egnantin vnsir vettirn stad Legnicz allen erin mytburgern vnde mytwonern, den, dy iczunt synt, adir hernochmols ewiklich in czukomftigen czeiten werden, daz vorbenante schrotamecht zcu Legnicz myt allir czugehorunge, myt allem rechte, freyheit vnde herschaft, alz vorgescreben steet, nicht vzczunem in allir wyze vnde mozse, alz dy briff, dy vormols dor obir gescrebin synt, volkomlich bekennen von vns, alz von eym vormunde, dy weile wir vormunde synt, vnde von vnsin egnantin vettirn vnde von erin nachkomlingen ewiklich vnde erblich zcu habin, zcu besiczin, zcu genysen vnde an derselben stad nucz czu wenden, alz en daz allir nuczlichst mag gesyn. Dez czu sicherheit habe wir desin briff von geheyse vnser egnantin vettirn myt erym ingesigel czu Legnicz vorsegelt heysen gebin an sent Dorotheen tage nach gots gebort dryczen hundirt jor ym dritten vnde sebenczichsten jore, do by synt gewest vnse lyebin getruwen, her Petir von Parchewicz, her Hans von Kothewicz, her Otte Buzewoy, rittire, Hans von Slewicz, Steffan Trache, Nyckel Pyskersdorff, Henczschel von Redirn, Hertel Buzewoy vnde Thomas vnse screiber, dem desir briff beuolen wart.

O. d. St. L. No. 134. Das vorige Siegel an grünseidner Schnur. — Bitschens Privilegb. f. XXXVIIIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866